Les Commandements de Dieu

Exode XX

Audi Israel

Leve le cueur, ouvre l'oreille
Peuple endurcy, pour escouter
De ton Dieu la voix nompareille,
Et ses Commandements gouster.

Je suis, dit il, ton Dieu celeste,
Qui t'ay retiré hors d'esmoy
Et de servitude moleste:
Tu n'auras aultre Dieu que moy.

Tailler ne te feras ymage
De quelcque chose que ce soit.
Si honneur luy fays, et hommage,
Ton Dieu jalousie en reçoit.

En vain son Nom tant venerable
Ne jureras, car c'est mespris,
Et Dieu ne tiendra incoulpable
Qui en vain son Nom aura pris.

Six jours travaille, et au septiesme
Soys du Repos observateur,
Toy, et les tiens, car ce jour mesme
Se reposa le Createur.

Honneur à Pere, et Mere porte,
Affin de tes jours allonger,
Sur la terre, qui tout'apporte,
Là où Dieu t'a voulu loger.

D'estre meurtrier ne te hazarde,
Metz toute paillardise au loing,
Ne soys larron, donne t'en garde,
Ne soys menteur, ne faulx tesmoing.

De couvoyter point ne t'advienne
La maison, et femme d'aultruy,
Son servant, ne la beste sienne,
N'aulcune chose estant à luy.

O Dieu, ton parler d'efficace
Sonne plus clair que fin alloy.
En noz cueurs imprime la grâce
De t'obeyr selon ta Loy.

Fin des Commandements de Dieu.