Pseaulme Vingtquatriesme à deux versetz pour couplet à chanter

Argument: David feit ce Pseaulme pour dire quand on ameneroit
l'arche où habitoit la divinité, dedans le temple que Salomon
devoit faire. Et est ledict Pseaulme propre pour chanter à la
consecration d'ung nouveau temple.

La terre au Seigneur appartient,
Tout ce qu'en sa rondeur contient,
Et ceulx qui habitent en elle.
Sur mer fondement luy donna,
L'enrichit, et l'environna
De maint riviere tresbelle.

Mais sa Montaigne est ung sainct lieu:
Qui viendra doncq au Mont de Dieu?
Qui est ce, qui là tiendra place?
L'homme de mains, et cueur lavé,
En vanités non eslevé,
Et qui n'a juré en fallace.

L'homme tel, Dieu le beneira:
Dieu son saulveur le munira
De misericorde, et clemence.
Telle est la generation
Cherchant, cherchant d'affection
Du Dieu de Jacob la presence.

Haulsez voz testes grands portaulx,
Huys eternelz, tenez vous haultz,
Si entrera le Roy de gloire.
Qui est ce Roy tant glorieux?
C'est le fort Dieu victorieux,
Le plus fort qu'en guerre on peult croire.

Haulsez voz testes grands portaulx,
Huys eternelz tenez vous haultz,
Si entrera le Roy de gloire.
Qui est ce Roy tant glorieux?
Le Dieu d'armes victorieux,
C'est luy, qui est le Roy de gloire.

Clément MAROT

Mélodie originale:
Psautier de Genève,1542
Loys BOURGEOIS, 1547
Harmonisations:
Claude GOUDIMEL
Claude LE JEUNE